Logjisti, ose tekniku i logjistikës, administron dhe kontrollon lëndët e para, produktet gjysmë të gatshme dhe të gatshme dhe të gjitha informacionet që lidhen me to. Menaxhon rrjetin e shpërndarjes, organizon rrjedhën logjistike të materialeve, ndjek planet e furnizimit dhe administron depon e mallrave.

Logjisti duhet të jetë në gjendje të menaxhojë fluksin e informacioneve dhe dokumenteve të mallrave dhe këtu përfshihen këto veprimtari: identifikon objektivat, funksionet kryesore dhe strukturën e një sistemi të menaxhimit për fluksin e informacionit të magazinimit; mbikëqyr dhe gjurmon mallrat përmes përdorimit të mjeteve informatike duke kontrolluar vazhdimisht fluksin e tyre; vlerëson informacionin dhe të dhënat për rrjedhën fizike dhe sasinë e mallrave të magazinuar; kontrollon nëse mallrat janë dorëzuar sipas kritereve të përcaktuara, duke ofruar zgjidhje për çdo anomali që mund të shfaqet gjatë rrugës; përcakton logjistikën e funksionimit të depove në varësi të strukturës fizike të tyre; përcakton kriteret dhe procedurat standarde për ruajtjen, lëvizjen dhe përpunimin e mallrave në depo; identifikon metodat dhe procedurat për monitorimin e nivelit të sigurisë së stoqeve (gjendjeve në magazinë); përcakton dhe zbaton procedurat për integrimin e kompjuterizuar të të dhënave për funksionet e ndryshme të sistemit të ndërmarrjes. Logjisti duhet të jetë në gjendje të menaxhojë rrjetin e shpërndarjes së mallrave dhe këtu përfshihen këto veprimtari: vlerëson kombinimet më efikase të shpërndarjes së mallrave sipas ndarjes së zonave; identifikon transportuesit më të përshtatshëm sipas llojit të mallrave dhe kohës së caktuar të shpërndarjes; analizon tregun e shërbimeve të transportit; lidh marrëveshje tregtare me ofruesit e shërbimeve të transportit; përcakton kriteret për shpërndarjen e mallrave në varësi të llojit të transportuesit dhe fazave të ndryshme të shkarkimit; identifikon treguesit e kostos që lidhen me shpërndarjen fizike të mallrave. Logjisti duhet të jetë në gjendje të zbatojë planet e blerjeve dhe këtu përfshihen këto veprimtari: kryen standardizimin e proceseve të administrimit të mallrave; mbikëqyr gjendjet në magazina; përcakton nivelet minimale e maksimale të gjendjes së magazinës në raport me prodhimin dhe nevojat e shitjeve; mbikëqyr dhe kontrollon fluksin e mallrave; raporton flukset hyrëse dhe dalëse të mallrave dhe kostot logjistike

Elementë të kontabilitetit industrial; elementë të organizimit të punës; logjistikë; logjistikë transporti; modelet e kontrollit në zinxhirin e furnizimit; normativa dhe legjislacioni kombëtar e ndërkombëtar për sigurinë e magazinave dhe depove; normativa e transportit; organizimi i transportit të mallrave; procedurat administrative, tatimore dhe doganore në lidhje me dërgesat kombëtare dhe ndërkombëtare; procedurat e administrimit të gjendjeve të magazinës; proceset e logjistikës së integruar; rrjetet e komunikimit dhe transportit; sistemi i shpërndarjes; sistemet e magazinimit dhe të lëvizjes së mallrave; sistemet menaxheriale dhe organizative të magazinës së mallrave; teknikat e planifikimit të veprimtarive; llojet e ndryshme të ambalazhimit dhe paketimit; llojet e mallrave dhe veçoritë e magazinimit dhe ruajtjes së produkteve bujqësore.

Të zbatojë konventat për transportin ndërkombëtar. Të zbatojë metodat e administrimit të gjendjeve të magazinës. Të zbatojë procedurat administrative dhe të kontabilitetit për regjistrimin e fluksit të magazinës. Të zbatojë procedurat e mbikëqyrjes të transportit të mallrave. Të zbatojë procedurat për raportimin e jokonformiteteve të mallrave. Të zbatojë procedurat doganore për importin dhe eksportin e mallrave. Të zbatojë procedurat e prokurimit. Të zbatojë procedurat për realizimin e inventarit të depove. Të zbatojë teknikat e ruajtjes së mallrave. Të zbatojë procedurat për optimizimin e transportit të mallrave. Të zbatojë teknikat e analizës së kostos. Të zbatojë teknikat e kontrollit të menaxhimit. Të zbatojë teknikat për planifikimin e menaxhimit të stoqeve. Të zbatojë teknikat e planifikimit të veprimtarive. Të zbatojë teknikat e analizës organizative. Të zbatojë teknikat e analizës statistikore së të dhënave. Të zbatojë teknikat e menaxhimit të depove. Të zbatojë teknikat e mbikëqyrjes së nivelit të shërbimit. Të zbatojë teknikat e mbikëqyrjes së planit të punës. Të zbatojë teknikat e programimit logjistik. Të përdorë programin ERP (Enterprise Resource Planning). LKP, pune hulumtueses, pershkrim per profesione te ngjashme, pershkrim i posacem, takime per validimin

Logjisti punon si në ndërmarrje prodhuese, industriale dhe tregtare, ashtu edhe në ndërmarrjet e shërbimeve të transportit ose logjistikës. Ky funksion gjen hapësirë në të gjithë sektorët e prodhimit, por veçanërisht në fushën e transportit, duke pasur në fokus ruajtjen dhe transportin e mallrave/produkteve, edhe për palë të treta. Një mjedis i mundshëm pune është ai i pikave të shitjes me shumicë, magazinave të mëdha ose rrjeteve të dyqaneve. Në përgjithësi ai ushtron profesionin e tij si i punësuar. Në marrëdhëniet e brendshme, ai është në kontakt të vazhdueshëm veçanërisht me departamentin e shitjeve dhe blerjeve, atë të prodhimit dhe me menaxherin e logjistikës (zinxhirit të furnizimit). Ai bashkëpunon me funksione të ndryshme të biznesit, të tilla si: departamenti organizativ, departamenti për administrimin e burimeve njerëzore dhe në veçanti me sistemet e informacionit. Në rastet kur ai punon në ndërmarrje të specializuara në sistemet e logjistikës, logjisti bashkëpunon ngushtë me departamentin e shitjes, duke ndërhyrë në hartimin e faturës dhe kontratës me klientin.